Mae Helen Mary Jones yn Aelod Cynulliad dros etholaeth Llanelli. Bu Helen Mary yn cynrychioli Plaid Cymru yn etholaeth Llanelli rhwng mis Mai 1999 a Mai 2003. Collodd hi'r sedd o 21 pleidlais yn unig yn 2003, ond ail-ennillodd y sedd ym mis Mai 2007 gyda mwyafrif o 3,884. Rhwng 2003 a 2007 bu Helen yn aelod Cynulliad dros Ranbarth Gorllewin a Chanolbarth Cymru.

Fe’i ganwyd yn 1960 yn Colchester, Essex ac fe’i haddysgwyd yn Colchester County High School for Girls, Ysgol Uwchradd Llanfair Caereinion a Choleg Prifysgol Cymru, Aberystwyth.

Cyn cael ei hethol, roedd Helen yn gweithio fel Is Gyfarwyddydd Datblygu gyda Chomisiwn Cyfle Cyfartal Cymru. Bu'n gweithio gyda'r sectorau cyhoeddus a gwirfoddol fel gweithwraig ieuenctid-cymunedol ac athrawes anghenion arbennig, ac mae'n gyn-aelod o Grwp Ymgynghorol y Cynulliad Cenedlaethol.

Safodd yn etholaeth Islwyn yn etholiadau cyffredinol 1992, gan herio Arweinydd y Blaid Lafur ar y pryd, Neil Kinnock, a safodd hefyd yn Sir Drefaldwyn yn etholiadau 1997.

Mae’n aelod o’r pwyllgor Amgylchedd, Cynllunio a Chefn Gwlad, y Pwyllgor Cyfle Cyfartal a Phartneriaeth Sector gwirfoddol ac mae ei diddordebau gwleidyddol yn cynnwys yr amgylchedd, yr iaith Gymraeg, hawliau plant a chyfiawnder cymdeithasol. Hi yw Gweinidog yr Wrthblaid dros Iechyd a Gwasanaethau Cymdeithasol yn y Cynulliad Cenedlaethol.

Dysgodd Helen Mary i siarad Cymraeg fel oedolyn, ac mae hi hefyd yn siarad Saesneg a Ffrangeg elfennol.

Mae Helen Mary yn rhannu ei hamser rhwng ei chartref yn Nhrimsaran a Chaerdydd. Mae’n mwynhau treulio amser gyda ei merch Catrin, nofio, darllen a meddwl am ddecrhrau garddio yn ei hamser sbar.